AP: PRC duh lohna lantirnaah buaina chhuak Dy. Chief Minister in an hal

Arunachal Pradesh state khawpui Itanagar-ah Zirtawpni liamta khan Arunachal mi ni lote hnena Permanent Residence Certi­ficate (PRC) pekchhuah duh lohna lantirna neih a ni a, buaina nasa tak a chhuak zui.

Duh lohna lantirtute hian police leh sorkar lirtheite an hal bakah khawpui chhung hmun hrang hrangah thil an tichhe nasa hle a ni. 

State sorkar ngenna angin Itanagar-ah hian sipai tirhluh zui an ni a, sipaite hian boruak thunun turin theihtawp an chhuah nghal a, buaina chhuak zel tur pawh an bengdai sawt hle niin nimin khan Army official-te chuan an sawi.

Union Home Minister Rajnath Singh pawhin Aru­nachal mipuite chu inbengdai tura chahin, buaina chhuak chungchangah hian Chief Minister Pema Khandu pawh a be tawh bawk.

Lungawi lo te hian Deputy Chief Minister Chowna Mein bangalow, Itanagar a mi chu an hal nia tarlan a ni a, Chowna Mein pawh hi Nam­sai district-ah nimin zing­ah khan a insawn a ni.

Itanagar-ah hian internet service tihtawp a nih bakah curfew puan a ni bawk.