Hmarchhak aṭangin Union Minister pahnih an awm

Ningani zan khan Delhi-a Rashtrapati Bhavan-ah Union Minister tharten rinawmna thu an tiam a, hetah hian hmarchhak mi pahnih - Kiren Rijiju leh Rameswar Teli-te pawh an tel.

Narendra Modi kaihhruai sorkar tharah hian Arunachal Pradesh MP Kiren Rijiju leh Assam MP Rameswar Teli-te chu union minister zingah an tel a, Kiren Rijiju hi Minister of State (Independent Charge) a ni a, Rameshwari Teli hi Minister of State a ni thung.

Kiren Rijiju hi chu term hmasaah pawh khan dinhmun pawimawh tak lo chelh tawh a ni a, Union Minister of State for Home Affairs a chang a ni. Rameshwari erawh Union Minister a nih ṭumkhatna a ni a, Kiren Rijiju hi Youth Affairs and Sports leh Minority Affairs-ah Minister of State atan ruat a ni a, Rameshwari Teli hi Minister of State for Food Processing Industries atan ruat a ni bawk.

Kiren Rijiju hi kum 48 mi a ni a, term hmasa leh kumin Lok Sabha inthlanah khan Arunachal West seat-ah MP atan thlan tlin ve ve a ni. Rameshwari Teli pawh hi kum 48 mi tho a ni a, Assam-a Dibrugarh seat-ah a ṭum hnih nan Lok Sabha MP atan thlan tlin a ni. Teli hian kumin Lok Sabha inthlanah khan Congress hruaitu hlun leh union minister hlui Paban Singh Ghatowar a hneh a ni. Hmarchhaka Lok Sabha seat 25 awmah BJP chuan seat 14 an la a, NDA-a an thawhpui party-te'n seat pali an la bawk.