Foreigners Tribunal-in ramdang mia a puan Mohammed a hna aṭangin an ban

Foreigners Trubunal-in ramdang mia a puan, India sipai retired leh Kargil war veteran Mo­hammed Sanaullah chu Assam Police-a Sub-Inspector a nihna aṭangin ban a ni. 

Assam Kamrup district-a Boko Foreigners Tribunal-in Sanuallah hi ramdang miah a puan hnuin Assam Police-te chuan ban a nih thu hi an tichhuak ve leh a ni. Assam police-te chuan thuchhuah siamin Foreigners Tribunal-in foreign national of post 25-3-1971-a a puan avangin sorkar hnathawk a nihna aṭangin ban a ni tih an tarlang.

Sanuallah hi kar hmasa kartir khan hren a ni a, Goalpara district-a detention camp-ah thawn a ni tawh. A chhungte chuan  Gauhati High Court-ah Foreigners’ Tribu­nal-in ramdang mia a puanna chu khing turin peti­tion an thehlut tawh bawk.

Police-te hian a uniform leh a bungraw dangte chu an laksak tawh a, hetih lai hian Zirtawpni liamta khan Sanaullah-a ukil Sahidul Islam chuan petition hi a thehlut tawh a, India khua leh tui a ni ngei a ni tih finfiahna an nei ṭha tawk tih a sawi.

Assam Directorate of Sainik Welfare (DSW) pawhin dan hmanga puih a nih theihna turin hma a lakpui bawk nia tarlan a ni. Sanuallah hi Indian Army-ah kum 30 aṭan hnuah Kum 2017-ah khan Honorary Captain-in a retired a, Assam police-ah hian a lut leh a ni.

July 30, 1967-a piang Kalahiklash khaw mi, Sanuallah hian 1987 khan Indian Army hi a zawm a ni.