April 4-ah Tripura district council inthlang dawn

 Tripura State Election Commissioner Manik Lal Dey chuan Tripura Tribal Areas Autonomous District Council (TTAADC) inthlan neih hun atan April 4 ruat a nih thu Thawhlehni khan a puang. 

Manik Lal Dey chuan district council inthlan neih tur atana hriattirna hi vawiinah tihchhuah a ni dawn tih sawiin, nomination paper thehluh hun hi March 12 thleng hawn a ni ang a, March 15-ah paper lutte hi endikin, inhnuhdawk duhte tan March 17 thleng hun hawn a ni dawn tih a sawi. 

Inthlan neih hunah re-poll neih ngaihna a awm a nih chuan April 7-ah neih a ni ang a, April 8-ah vote chhiar a ni dawn tih Dey chuan a sawi bawk. District council inthlan neih hun tur puan a nih tak avangin a huam chhunga mode code of conduct hman nghal a ni. 

TTAADC-ah seat 28 awmin, vote nei mi 8,65,041 an awm. Vote thlakna tur polling station 1,244 a awm bawk. TTAADC hian Tripura state zau zawng hmun thuma ṭhena hmun hnih a huam a, a huam chhunga cheng zinga 90% hi tribal an ni. 

Nikum May 17 khan TTAADC term hi a tawp a, a term zawh hnu hian BJP kaihhruai state sorkar chuan Governor's rule hnuaiah dahin, IAS officer (retd) chu thla ruk chhung atan Administrator-ah a dah a ni. Thla ruk a ral hnuah nikum November 17 khan Govenor's rule hi thla ruk dang atan a pawhsei zui leh a ni.