Community parukte hnena PRS pek tura rawtna awm Arunachal sorkar in pawm dawn lo: Rijiju

Arunachal Pradesh mi, Union Minister of State (MoS) for Home Affairs Kiren Rijiju chuan Pathianni khan chuan high-level committee in community parukte hnena permanent resident certificate (PRC) pek tura rawtna an siam chu Arunachal sorkar chuan a pawm dawn lo tih sawiin, Congress chu mipuite a ni lo zawnga fuihpawrhah a puh. 

Kiren Rijiju chuan Arunachal Pradesh sorkar chuan Joint High-Powered Committee in Namsai leh Changlang district-a cheng community parukte hnena PRC pe tura rawtna a siam chu pawm lo turin thutlukna an siam tih sawiin, mi zawng zawng chu muanna a awm theihna atan midang mawhpuh mai loin an 

ṭanrual a ngai tih a sawi.

Rijiju chuan Chief Minister Pema Khandu pawhin hemi chungchang hi a sawichiang tawh tih sawiin, Congress pawhin PRC chu do ve tho mah se a ni lo zawngin mipui an fuihpawrh a ni, a ti.

Union Minister chuan, "A tir aṭangin state sorkar hnenah chuan PRC chu ram neitute humhimna tur a awm a nih loh chuan pawm lo turin ka ngen a ni" a ti bawk.

PRC duh lo hian state khaw­pui Itanagar-ah kar liamta Zirtawpni khan mipuiin kawng an zawh a, hetah hian buaina nasa tak chhuak zuiin Inrinni-ah kha chuan curfew puan a ni hial a ni.

Duh lohna lantirtute hian police leh sorkar lirthei eng emaw zat halin, motor 200 vel chu an hal chhia nia tarlan a ni a, Deputy Chief Minister Chowna Mein chenna in pawh an hal bawk. Deputy Commissioner in pawh an khawih nia tarlan niin, bungrua eng emaw zat an tichhia a ni. Arunachal Pradesh buaina chhuakah hian mi pahnih in nunna an chan bakah, mi eng emaw zatin hliam an tuar  bawk.

Mipui pungkhawmte hian Chief Minister Pema Khandu-a chenna in pawh hal an tum bawk nia sawi a ni a, Pema Khandu hian nimin khan buaina chhuak vang hian All party meeting a ko nghal bawk a ni.