Assam-a zu chhe in vanga thi 140 tling tawh; Zangnadawmna atan cheng nuai hnih ṭheuh pe dawn

Assam-a Golaghat leh Jorhat district-a zu chhe in vanga thi chu 140 an tling tawh niin thuneitute chuan an sawi. 

Tualchhung reporter ṭhenkhat chuan thi zat hi 160 aiin an tam tawh ni ten an sawi a, mi 200 vel chu damdawi-inah enkawl mek an ni bawk a, heng zinga 16 hi chu an dinhmun a ṭha lo hle niin an sawi bawk.

Golaghat Deputy Commissioner Dhiren Hazarika chuan an district chhung bikah chuan mi 85 an thi tawh tih sawiin, mi 100 tling lo deuh damdawi-inah enkawl mek an nih thu a sawi. Pathianni chawhnu lam kha chuan damdawi-ina lut zat hi an tlahniam ve ṭan niin a sawi a ni.

Jorhat Deputy Commissioner Roshni Korati chuan Pathianni thleng khan an district-ah chuan mi 53 vel chu an thi tawh tih a sawi ve thung. Jorhat Medical College and Hospital (JMCH)-ah mi 160 enkawl mek an ni tih a sawi bawk a, heng zinga 16 hi chu an dinhmun a ṭha lo hle tih a sawi.

Excise Department chuan dan loa zu zuar dap beihpui an thlak mek a, zu dawr eng emaw zat chu mipuiin an tichhe tawh bawk.

Civil society pawl leh vantlang mipuite chuan zu chhe siamnaa mawhphurtu chu manchhuah a, hremna pek ngei ngiatin kawng an zawh. Excise Department thupuangtu chuan thubuai 90 vel chu an ziaklut tawh tih an sawi a, zu litre 4860 vel chu Zirtawpni aṭang khan an tichhe tawh tih a sawi.

Kar liamta Ningani zanah khan Golaghat leh Jorhat district huamchhunga cheng mi eng emaw zat chuan Golaghat-a Salmora tea estate leh Jorhat district-a thingtlang khaw pakhatah zu chhia hi an in a ni.

Assam Chief Minister Sarbananda Sonowal chuan Inrinni khan zu chhe in vanga thi chhungte hnenah hian zangnadawmna cheng nuai hnih ṭheuh an pe dawn tih sawiin, damdawi-ina enkawl mekte hnenah pawh cheng singnga ṭheuh an pe dawn tih a sawi.