AP buaina: CM in all party meeting ko

Arunachal Pradesh Chief Minister Pema Khandu chuan permanent resident certificate (PRC) chungchang vanga an state in buaina nasa tak an tawh avangin Thawhṭanni khan all party meeting a ko.

Thawhṭanni-a CM in all party meeting a kohah hian eptu pawl pakhatmah an inlan lo thung a, BJP cabinet minister leh MLA tlemte chauh an inlan. National People's Party, Peoples Party of Arunachal Pradesh leh Congress party-te chuan all party meeting hi an boycott a ni. 

Hetihlai hian community-based orga­nisation leh zirlai pawl eng emaw zat chu meetingah hian an kal thung.

Arunachal Home Minister Kumar Wai chuan dan leh thupek bawhchhiatna a awm lo tih sawiin, misual ṭhenkhat in bill pawm a ni dawn tia sawiin thu dik lo an thehdarh tih a sawi. Police force hmanga boruak an thunun theih thu a sawi a ni.

CM Pema Khandu chuan sorkarin PRC chu a ngaihtuah dawn lo a ni tih tiamin, he thil vanga buaina chhuak chu pawi a tih thu leh nunna chan hial an awm chu pawi a tih thu a sawi. PRC issue chu khar a nih tawh thu sawiin mipuite chu buaina siam zui lo turin a ngen. Sorkar chu ring ngam tura ngenin chhuichianna nei turin commissioner level committee a din thu a sawi a, Arunachal chu state ralmuang tak a nih avangin tu emaw in buaina a chawkchhuak nia a ngaih thu a sawi bawk. 

Zirtawpni liamta leh Pathianni inkar khan Arunachal Pradesh sorkar in ram neitu ni lote hnena PRC pek a tum dodalna avangin state khawpui Itanagar-ah buaina nasa tak a chhuak a, mi pali in nunna an chan phah hial.

PRC duh lote hian kawngzawh an huaihawt a, buaina nasa tak chhuak zuiin, sorkar leh police lirthei tam tak tihchhiat a nih bakah, Chief Minister mimal in pawh beih a ni a, Dy CM in pawh hal a ni bawk. 

Arunachal buaina bengdai tur hian ITBP battalion 15, ITBP jawan 1,000 awmna chu thawhluh an ni. BJP chuan buaina hi Congress chawhchhuahah an puh a ni.

 Congress in CM leh Rijiju ban phut Congress party chuan Arunachal Pradesh chu Kashmir ang maia siam tumah BJP chu puhin PRC vanga buaina chawkchhuakah Pema Khandu kaihhruai sorkar chu an puh.

Congress chuan police-ten mi an kahhlum chungchang pawh chhuichiang tura an phut thu an sawi. Party General Secretary Luizinho Faleiro kaihhruai party aiawhte chuan Ministry of Home Affairs (MHA) hnenah memorandum thehlutin, CM Pema Khandu, Deputy Chief Minister Chowna Mein leh Union Minister of State for Home Afairs Kiren Rijiju-te chu an tih ngei ngei tur an tih loh avangin bang turin an phut.

Faleiro chuan BJP chu PRC leh Citizenship Amendment Bill hmanga Kashmir ang maia Arunachal siam tumah a puh a ni. 

Arunachal buaina chhuaka police silai hmehpuaha thi, mipa naupang pali-te sunna hun chu Thawhṭanni khan hman niin, sunnaa kalte hian candlelight rally an nei.

District Tangsa Student Union President Sengman Ronrang chuan mi huaisen pali an chan tih sawiin, an nun an hlanna avangin Arunachal sorkar chuan State Assembly-a Permanent Citizen Bill pharh tawh ngai lo turin thutlukna an siam a ni, a ti.

Candlelight rally-ah hian Women’s Welfare Society, Yobin Welfare Society, Yobin Youth Association, Galo Welfare Society, Tagin Student Union, Singpho Women Organization, Muklom Elite Society, Singpho Development Society, officer, public leader-te leh Kohhran aiawhte hi pawh an tel a, mi 500 vel an pungkhawm a ni.