Rahul Gandhi-an Assam tlawh Lok Sabha inthlan tur atana campaign ṭan

Congress President Rahul Gandhi chuan Thawhlehni khan Lok Sabha inthlan atana campaign ṭanin Assam a tlawh.

Rahul Gandhi chuan Lok Sabha inthlan awm turah chuan Congress chuan hnehna an chang dawn tih sawiin Assam-a seat zawng zawng an la dawn tih a sawi a, a thusawinaah hian BJP leh RSS-te pawh a bei zui bawk a ni. 

Khanapara Veterinary Ground, Guwahati-a vantlang inkhawma thu a sawinaah Gandhi chuan rorelna chang mek BJP sorkar chu beiin an campaign laia an thutiamte tihhlawhtling loah a puh. Gandhi chuan, "Modi-an thil tam tak a tiam a, mahse enge a tih? Loneitute tan engmah a tihsak lo, thingpui huana hnathawk te leh Assam ṭhalaite tan eng nge a tih? Keini chuan thingpui huana thawkte account-ah direct in pawisa kan thawn dawn a ni". a ti.

Rahul Gandhi hian Thawh­lehni chhun dar 12.30 khan Lokpriya Gopinath Bordoloi International (LGBI) Airport, Guwahati thlengin, Arunachal Pradesh-a Permanent residence certificate (PRC) buaina vanga hliam tuar Apollo hospital-a awm mi pahnihte chu a tlawh nghal bawk.

Doctor chuan dam lo te chu uluk taka an enkawl thu a hrilh nia tarlan niin, Gandhi pawhin doctor-ten ṭha taka an enkawl thu leh ngaihtuahawm a nih loh thu a sawi. 

Congress president hi Assam Congress president Ripun Bora leh Arunachal Pradesh Congress president Takbam Sanjoy-ten an ṭawiawm a ni.

Hemi hnu hian Veterinary Ground-ah hian thu a sawi a, Congress worker nuai khat vel he hunah hian he hunah hian an tel nia tarlan a ni.

Gandhi chuan hmarchhak industrial policy an ṭan ṭha leh dawn tih sawiin Jagiroad leh Cachar paper mill-te pawh an hawng leh dawn tih a sawi. Congress chuan sorkarna an siam a nih phawt chuan Assam chu hmarchhak tana technical education centre tharah an siam dawn tih sawiin, high quality education pek a tiam bawk.

Thu a sawinaah hian thingpui huana thawkte hnenah pawh mini­mum wage pek a tiam bawk a ni.

Congress president chuan sorkarna an chang a nih chuan India mi, National Register of Citizens (NRC)-a tel lote chu khua leh tui nihna an pe leh vek dawn tih a sawi bawk.

Rahul chuan BJP-RSS ideo­logy chuan hmarchhak state tinte a hal mek tih sawiin, an lifestyle, culture, ṭawng leh history-te an bei mek tih a sawi. Nagpur culture chu hmarchhakah hman an tum niin a sawi. Congress chuam hmarchhak culture chu an humhim tlat dawn tih a sawi a ni.