Meghalaya: KHADC leh JHADC inthlang

Meghalaya-a Khasi Hills Autonomous District Council (KHADC) leh Jaintia Hills Autonomous District Council (JHADC) inthlanna chu nimin khan neih niin, heng ADC pahnihah hian MDC 29 ve ve an thlang dawn a ni.

Zing dar 6:30-7.00 khan inthlanna hi neih ṭan niin, KHADC-ah hian hmeichhe candidate pasarih awmin JHADC-ah hian hmeichhe pakhat candidate a awm thung.

Thawhṭanni tlai dar 4 thleng khan campaign phal niin, KHADC leh JHADC candidate eng emaw zat hian rally-te an buatsaih  a ni. KHADC-ah hian candidate 130 awmin, JHADC-ah hian candidate 101 an awm a ni.

Jaintia Hills-ah hian CEM hlui Moon­light Pariat leh JHADC CEM Lamdibok Sumar-te an ni a, anni pahnih hi UDP hmingin an ding.  Congress ticket-a ding CEM hlui tho Andrew Shullai pawh a langsar viau bawk. 

Khasi Hills lamah hian UDP candidate leh MLA hlui ni bawk Paul Lyngdoh, NPP candidate leh sitting MLA, Gigur Myrthong leh Independent candidate, Lambor Malngiang-te chu an langsar ve thung a ni.

Congress, National People’s Party, United Democratic Party, Hill State People’s Democratic Party, People’s Democratic Front leh Khun Hynniewtrep National Awakening Movement (KHNAM)-ten candidate an neih bakah Independent candidate 19 an awm bawk.

KHADC-ah hian polling station 1433 awmin JHADC-ah hian polling station 408 a awm thung. Kumin inthlan aṭang hian NOTA an hmang ṭan dawn a ni.