Himanta Biswa-an BJP campaign hawng

Assam Finance Minister Himanta Biswa Sarma chuan Thawhṭanni khan BJP campaign a hawng.

BJP campaign hming hi ‘Bharat ke Mann ki Baat, Modi ke Sath’ tih a ni. He campaign-na hnuaiah bik hian ramchhung hmun hrang hranga mipuite chu an manifesto siamna kawnga pui turin an sawm dawn a ni.

Himanta Biswa Sarma chuan thla khat daih campaign, February 3 aṭanga ṭan tawh hmang hian an party chuan mipuite ngaihdan an lakhawm dawn tih sawiin hemi hmang hian manifesto an siam dawn tih a sawi.

North East Democratic Alliance (NEDA) convenor chuan hemi atan hian an party chuan box  7,500 chu hmun hrang hrangah an dah dawn tih sawiin, hetah hian mipuite chuan manifesto atana an duh te ziakin an thlak dawn a ni. Bawm an siam zawng zawng zinga 10% vel chu hmarchhakah dah a ni dawn tih sawiin mipui vaibelchhe khat tal ngaihdan lakkhawm an duh thu a sawi bawk.

BJP leh an thawhpui party-te chuan Lok Sabha inthlanah hmarchhak bikah candidate 25 an nei dawn tih sawiin, heng zinga seat 19-21 chu an lak dawn thu a sawi. Assam-ah chuan seat 10 an la dawn tih a sawi bawk a ni.

Himanta Biswa Sarma chuan Vidhan Sabha election 2021-ah a ding dawn lo tih a sawi. 

Sarma hi Lok Sabha inthlan­ah erawh a ding maithei nia sawi a ni thung. North Lakhimpur-a program­me a hmanpuinaa thu a sawinaah Vidhan Sabha election-ah a ding dawn lo tih hi a sawichiang a, Lok Sabha inthlanah erawh an party in an remti a nih chuan a ding ngei dawn tih sawiin, a nih loh chuan kum nga dang a nghah leh mai a ngai dawn tih a sawi a ni.