IAF AN-32 thlawhtheihna bo zawn chhunzawm zel

Indian Air Force, Indian Army leh Indo Tibetan Border Police ṭangkawpte chuan Thawhṭannia chin hriat loha bo AN-32 aircraft zawn hna chu Arunachal Pradesh leh a chhehvelah an chhunzawm.

Wing Commander Ratnakar Singh chuan nimin kha chuan boruak pawh a thiang tawh hle tih an sawi a, MI 17 pahnih leh ALH pakhatte chu zawn hna thawk turin tirh an ni tih a sawi. Lei lamah Army te leh ITBT te chuan an zawng ve mek bawk tih a sawi.

Indian Air Force transport aircraft AN-32 hi Thawhṭanni chawhnu dar 12:25 khan Assam-a Jorhat aṭangin Mechuka Advance Landing Ground, Arunachal Pradesh panin a thlawk chhuak a, a hnu lawkah chin hriat lohin a bo zui a ni. He aircraft-ah hian crew member mi pariat leh passenger mi panga, an vaiin mi 13 an chuang. An bona hi China border hnaih a ni a, Indian Air Force chuan a zawn hna hi an thawk nghal a ni.

A bo tih an hriat hnu lawkah C-130, AN-32 aircraft, Mi-17 pahnih leh Indian Army ALH helicopter-te chuan zawn hna an thawk nghal a, a chetsualna hmun ni awm takte pawh hmu mah se a hmun an thlen chuan engmah chetsualna hnuhma an hmu lo. 

Arunachal Pradesh-a Shi Yomi district thuneitute pawhin aircraft bona bul vela cheng tual­chhung mite chu zawng tur­in an tirchhuak ve bawk a ni.