CAB tharthawh leh tumna a awm a nih chuan A do turin Congress an inpeih reng: Mukul Sangma

Meghalaya Legislative Assembly-a opposition leader leh Congress hruaitu hlun Dr Mukul Sangma chuan CAB tharthawh leh tumna a awm a nih chuan Congress chu a dolet turin an inring reng tih a sawi. BJP chuan an mahni thlawp lotu mipuite duh­dan chu an enkan tur a ni lo, a ti bawk.

Chief minister hlui Mukul Sangma chuan, "BJP chuan an inthlan auhlaah thuneihna an chang leh a nih chuan CAB chu tharthawh leh an tum tih a sawi a, mahse an mahni vote lotute duhdan chu an enkan thei lo ang. BJP hian India ram chu mi chi hrang hrang inang lo tak tak awmkhawmna a ni tih an hre tur a ni," a ti.

Mukul chuan political party-te chu sorkarna siam thei an nih avang ringawtin an duh danin engkim an ti thei tihna a ni lo tia sawiin, mipuite duhdan kalhin an che ngawt thei lo a ni, a ti. Democracy-ah chuan mipui tlem zawkte aw pawh ngaihthlak a ni tho tur a nih tih a sawi bawk. 

Citizenship Amend­ment Bill (CAB) chu hmarchhak mite chuan an do tlat tih sawiin, eptu pawl lian ber an nih angin Congress chuan an ngaihven reng tih a sawi. CAB chu hmarchhak mipuite tan chuan a hlauhawm tih sawiin, sorkar laipui pawhin engvanga hmarchhak mipuite hian dodal nge an ni tih an ngaihtuah ve tur a ni, a ti bawk.