Golay-a hian CM ni turin dikna chanvo a nei lo: Chamling

Sikkim chief minister kal chhuak ta Pawan Kumar Chamling chuan Thawhṭanni khan an party, Sikkim Democratic Front (SDF) chuan chief minister thar PS Golay-a'n CM dinhmun a luah chu an dodal dawn tih a sawi.

Pawan Kumar Chamling chuan Golay-a chuan CM ni turin dikna chanvo a nei lo tih sawiin, MLA aṭanga disqualify a nih hnuah he dinhmun hi a luah thei lo tih a sawi a, constitution kalh a ni tih a sawi bawk. PS Golay hi 2016 khan eirua puh a nih avangin MLA a nihna aṭangin disqualify a ni.

SDF chief chuan CM atana Golay ruatna a ni emaw minister dangte ruatna chu dan kalh a ni tih sawiin, CM ber ruatna chu ram danpui kalh a ni, a ti. Thawhṭanni khan Sikkim MLA thlan tharte hian rinawmna thu an tiam a, thutiam an lak zawh hnu hian Pawan Chamling hi a chhuak nghal a ni. Thuthar thehdarhtuten an kawmnaah SDF thupuangtu Bhim Dahal chuan an party MLA 15-te chuan PS Golay-a CM a nih chhung chuan assembly session zawng zawng an boycott vek dawn tih a sawi.