AP: IAF aircraft zawn hna kalpui zel

Thawhṭannia Assam aṭanga thlawk chhuak, Arunachal Pra­desh state china chin hriat loha bo IAF AN-32 aircraft zawn hna chu la kalpui chhunzawm zel a ni.

Indian Navy chuan Thawh­lehni aṭang khan thlawhtheihna bo zawn hna hi an zawm ve leh a, satellite hmanga zawn a ni tel bawk. Chhun lamah helicopter hmanga zawn a ni a, zanah chuan thima hman chi sensor hrang hrang hmanga zawn a ni. Lei lama a zawn hna thawktute pawhin zan lamah hian an hna an chhunzawm reng tho bawk.

Defence official-te chuan Indian Army, Indian Navy, Police leh State thuneitute chuan an theihtawpin thlawhtheihna zawn hna hi an thawk tih an sawi a, thlawhtheina boa chuang chhungte hnenah pawh an hmasawn dan chin an hrilh hre nghal zel tih an sawi.

AOC-in-C EAC, Air Marshal RD Mathur pawhin Thawhlehni khan Jorhat-a Air Force Station tlawhin AN-32-a chuang chhungte a hmu a ni. Arunachal Pradesh Chief Minister, Pema Khandu pawhin an theih ang anga ṭan­pui a tiam bawk a, thlawhtheihnaa chuang mi 13-te leh an mahni zawn hna thawktute tana ṭawngṭai a ngaih thu a sawi bawk.

Indian Air Force transport aircraft AN-32 hi Thawhṭanni chawhnu dar 12:25 khan Assam-a Jorhat aṭangin Mechuka Advance Landing Ground, Arunachal Pra­desh panin a thlawk chhuak a, darkar chanve hnu velah chin hriat lohin a bo zui a ni. He aircraft-ah hian crew member mi pariat leh passenger mi panga, an vaiin mi 13 an chuang. An bona hi China border hnaih a ni a, a zawn hna hi ngawrh taka kalpui a ni. 

He thu ziah lai thleng hi chuan a bona chin hriat a la ni loa, satellite, spy aircraft leh heli­copte-te hmangin chhun zan zawm­in an zawng a ni.