Nagaland: ANCSU-in Education Director bang turin phut Police-te'n tih luihna hmangin an hnawt darh

All Nagaland College Students’ Union (ANCSU) chuan Thawhlehni khan Kohima-a Civil Secretariat bulah, Technical Education Director ban ngiatin chaw ngheia nawrh an huaihawt a, police-te'n tihluihna hmanga hnawh darh an tumnaah buaina a chhuak zui.

Nawrh huaihawtnaah hian zirlai pungkhawm an tam hle a, police-te hian tui phuhna leh tear gas hmangin zirlaite hi an hnawt darh a ni. ANCSU presi­dent Katho Awomi leh midang pahnih chu an hreng zui bawk. ANCSU hian State Tech­nical Scholarship fund cheng vaibelchhe 1.32 dik lo taka hmanga puh Technical Educa­tion Director leh official-te chu bang turin an phut a, scholarship scheme hrang hrang kalpuina tur nodal cell kalpui vat te, Kohima Science College ram buaina chinfel thuai te, sorkar zirna-ina ram buai hrang hrang chinfel te, Nagaland Public Service Commission-a assitant professor post ruak 110 hnawhkhah vat leh state leh sorkar laipuiin an pek scholarship scheme hrang hrangte chhui chian te an phut a ni.

Katho Awomi chuan an thil phut chu tihhlawhtlin a nih hma chuan nawrh huaihawt chhunzawm zel an tum tih a sawi. Thawhlehni zinga Technical Education Directorate-a nawrh an huaihawt chu district thunei­tuten an remtih loh avangin police-te chuan an lo dang a, Civil Secretariat hi an pan a ni. Awomi chuan ANCSU-te chuan zirlai tumah an nawrh huaihawtnaa tel tura an sawm loh thu sawiin, mahse zirlai tam tak an punkhawm thu a sawi a ni. 

 ANCSU chuan police-te chu an dem tih an sawi nghal a, India danpui, Article 19-naa fundamental rights palzutah an puh a ni.