Tripura-a tui lian vangin mi 1000 chuangin chenna-in chhuahsan

Kar kal ta Inrinni aṭang khan Tripura-ah ruah nasa takin a sur a, hmun tam takah tui a lian. Tui lian avang hian mi 1,000 chuangin chenna-in an chhuahsan a, mi pakuain hliam an tuar bawk.

State Emergency Operation Centre-in an tarlan dan chuan Thawhṭanni tlai thleng khan mi 1,746 chu relief camp 12-ah an awm tawh. Chenna-in chhuahsante hi West Tripura leh Sepahijala district-a chengte vek an ni.

Thlipui leh ṭek thawkin in 283 vel chu nasa takin a tichhia a, 866 vel chu a tichhe nual bawk. In 66 phei chu luah tlak loh khawpin a tichhia a ni. Heng in zawng zawng hi West, Sepahhijala, Gomati leh South district amite vek an nih thu report chuan a tarlang.

Chief minister Biplab Kumar Deb chuan district thuneitute chu chhan­chhuah hna thawk nghal turin leh chhawmdawl hna a rang thei ang bera thawk nghal turin a hriattir a ni. Thla hnih liam ta chhung khan hmar­chhakah ruah sur nasa, thlipui leh ṭek thawkten harsatna an thlenah mi 4000 vel chuan an chenna-in an chhuahsan tawh a, hmeichhe pakhat a thih phah tawh bawk.

Tripura bakah hian Assam chu tui­lian vanga harsatna tawk nasa an ni.