CPI-M GS-in BJP dona kawnga inlungrual turin ngen

Communist Party of India - Marxist (CPI-M) General Secretary Sita­ram Yechury chuan Thawh­lehni khan Tripura state khawpui Agartala-ah thusawiin, secular demo­cratic force hrang hrangte chu India ram dan­pui chhanhimna kawnga thawhpuiah a sawm.

Sitaram Yechury chuan Lok Sabha result chu CPI-M tan chuan hnungtawlhna nasa tak a ni tih sawiin; left party chu Bengal-ah chauh ni lo, an chakna ṭhin state - Tripura leh Kerala-ahte pawh an che ṭha lo hle tih a sawi. An party chauh ni lo, eptu party dangte pawh party tlemte chauh lo chu an che chhe hle tih a sawi tel bawk. 

Yechury chuan CPI-M leh Left aiawh Par­liament-ah an tlem tawh hle tih sawi bawkin, an party din a nih aṭanga an dinhmun chhiat lai ber a nih thu a sawi. BJP-in Lok Sabha inthlana hnehna chiang taka an channa chuan ramchhungah sakhaw behchhan party lian tak a awm tih a tichiang hle tih a sawi a, hemi avang hian BJP pawhin Muslim MP pakhat pawh an nei lo a ni, a ti bawk. Hei hian India secular democratic kal dan tur a tilang tih a sawi a ni.