Modi-a'n a term hnihnaah Naga buaina a chingfel dawn: BJP

Nagaland Bharatiya Janata Party (BJP) chuan kum tam tak chinfel loha awm tawh, Naga politics buaina chu prime minister Narendra Modi chuan a term hnihnaah hian a chingfel dawn tih Nilaini khan an sawi.

BJP leader leh state deputy chief minister Y Patton chuan Congress-in sorkarna an siam kum 35-40 chhung khan Naga buaina hi an chingfel thei lo tih sawiin, PM Modi kaihhruai BJP sorkar chuan tun ṭumah hi chuan an chingfel tawh ngei dawn tih a sawi.

August 2015 khan National Socialist Council of Nagaland - Isak Muivah (NSCN-IM) leh sorkar laipui chuan framework agreement an ziak a, inremna zawnga inbiaknaah hian Naga nationalist political group parukte pawh a hrang ṭheuhin an tel. Mahse vawiin thlengin hmasawnna a la awm leh lo thung.

Y Patton chuan prime minister thi ta Atal Bihari Vajpayee pawh khan Naga history danglam tak chu a hlutpui tih a sawi a, Nagaland-a ṭangrual sorkar - People’s Demo­cratic Alliance (PDA) ah pawh BJP chuan legislator 12 lai neiin, Chief Minister Neiphiu Rio kaihhruaina hnuaiah chuan 2023 state assembly election hma chuan buaina a awm dawn lo tih a sawi.

PDA-ah hian Nationalist Democratic Progressive Party, BJP, National People’s Party, Janata Dal (United) leh Independent MLA-te an tel a ni. NSCN-te hian Naga mi hmun hrang hranga awmte awmkhawmna tur state zau zawk, Greater Nagaland (Nagalim) pek an ngiat a, hemi avang hian buaina nasa tak a chhuak a ni. Framework agreement-a thu inziakte hi vawiin thlenga tlangzarh a la nih loh avangin Nagaland ṭhenawm state-te chu an lawm lo hle a, an state chin lak hek a nih an hlauthawng a, an lo sawisel fo tawh bawk.