Assam first language-a Bengali hman tumna campaign Hmarchhaka Bengali minority group-te'n an dodal

Assam inchhiarpui 2021-a neih tura Assam first language-a Bengali ṭawng hman a nih theihna atana social media lama campaign-na awm chu hmarchhak-a Bengali minority group-te chuan Assamese leh Bengalis-te inkara buaina chawhchhuah tumna a nih thu an sawi.

Social Media-a campaign kalpui hi ‘Mission Chalo Paltai 2021’ (Mission Let Us Change 2021) tih a ni a, Kolkata, Delhi leh Assam-a Bengali ṭawng hmangte hmalakna nia sawi a ni. An campaign-naah hian Muslim leh Hindu Bengali, Assam-a chengte chu an inrem lohnate theihnghilh a, chhiarpui neih pianpui ṭawnga Bengali tih ziak turin an ti a ni.

He movement-a hruaitute hi - Kolkatta ami Garga Chatterjee, Delhi mi Chandan Chattopadhyay leh Assam mi Santanu Mukhopadhyay-te an ni a, Facebook-ah video post-in hmarchhak chu Assamese-te ni loin Bengali-te ta a nih zawk thu an sawi. Tun hma chuan an tam zawk ṭhin tih sawiin, tihluihnaa an pianpui ṭawnga Ahomiya tih ziahtir ṭhin an nih thu an sawi bawk.

Campaign hi West Bengal-a sorkarna siam mek Trinamool Congress-te kalpui a nih rin a ni bawk a, Lok Sabha-a an chet ṭhat loh hnu khan Bengali sentiment miteah tuh an tum nasa hle nia sawi a ni. Trinamool hi Assam-a National Register of Citizens kalpui mek dodaltu langsar ber zinga mi an nih bawk avangin Assam first language-a Bengali hman a nih theihna campaign-naah pawh hian rinhlelh an kai hle. Mahse Trinamool hruaitute chuan hemi chungchang hi an pha thung.

Assam hmun ṭhenkhatah chuan Bengali leh Assamese ṭhenkhat chuan Chalo Paltai campaign duh lohna kawngzawh hi an nei a, mipuite chu Campign kalpuitute thangkama in awhtir lo turin an ti. All Assam Minority Students’ Union (AAMSU) President Rejaul Karim Sarkar chuan ‘Mission Chalo Paltai 2021’chu Assam tihchhiat tumna leh ram neitu nih inchuha buaina chawhchhuah tumna a nih thu a sawi.

Hetihlai hian Guwahati mi Right To Information (RTI) activist Dulal Bora chuan campaign tihtawpna tur hian police-te hnenah complaint a thehlut ve bawk. Bora chuan campaign pathum pali vel a lut tawh tih a sawi bawk. All Assam Bengali Yuva Chatra Federation president, Kamal Choudhury chuan Assamse leh Bengali-te inkara hem thlak tumna a ni, a ti. Bengali ṭawng hmangtute chu he campaign laka inthlarfihlim tur hian a chah bawk.

Dodalna hi tam hle mah se Chalo Paltai campaigner-te chuan an dikna chanvo chu an hria tih an sawi thung a, hunkal tawha harsatna hrang hrang, voter-te leh detention camp-a dahten an tawh inhriattir nawn lehna atana kalpui an nih thu an sawi bawk.