Nagaland sorkarin ANCSU thil phut tihhlawhtlin remti

Nagaland sorkar chuan tiam chin awm loa chawngheia nawrh huaihawt, All Nagaland College Students’ Union (ANCSU) te thil phut chu tihhlawhtlinsak an remti ta.

ANCSU vice president Benjong Longchar chuan chief minister Neiphiu Rio, higher & technical education minister, Temjen Imna Along leh mipawimawh dangte nena meeting an neih zawh hnua thuthar thehdarhtuten an kawmnaah sorkarin an thil phut tih hlawhtlinsak a remtih thu hi a sawi.

ANCSU hian State Technical Scholarship fund cheng vaibelchhe 1.32 dik lo taka hmanga puh Technical Education Director leh official-te chu bang turin an phut a, scholarship scheme hrang hrang kalpuina tur nodal cell kalpui vat te, Kohima Science College ram buaina chinfel thuai te, sorkar zirna-ina ram buai hrang hrang chinfel te, Nagaland Public Service Commission-a assitant professor post ruak 110 hnawhkhah vat leh state leh sorkar laipuiin an pek scholarship scheme hrang hrangte chhui chian te an phut a ni.

An thil phut avanga nawrh an huaihawtnaah hian Thawhlehni zing khan buaina nasa tak a lo chhuak tawh a ni.