AP Dy CM-in state budget 2021-22 a pharh

Arunachal Pradesh Assembly budget session neih mekah, Nilaini khan deputy chief minister Chowna Mein chuan kum 2021-22 atana state budget a pharh. 

Finance changtu, Deputy Chief Minister chuan budget tharah fiscal deficit chu kum hmasaa 2.28% aṭangin 2.19% ah a tlahniam tih a sawi. Kum 2020-21 chhunga sum hmuh tura ruahman chu Rs vbc 22,581 a ni. Union budget 2021-22 a tarlang angin, Central tax-a state chanpual chu Rs vbc 11,693 tura ruahman a ni tih sawiin, state own tax revenue aṭangin Rs vbc 1,900 leh non-tax revenue aṭangin Rs vbc 850 hmuh an inbeisei tih a sawi. 

Budget thar revenue expenditure atan Rs vbc 15,344.32 ruahman a nih thu sawiin, capital expenditure hian loan component, Rs vbc 6,968.68 a huam tel tih a  Mein chuan a sawi bawk a ni. Education sector hnuaia hmalakna thar tur hrang hrang tarlan zingah Vivekananda Kendra Vidyalayas tan additional grand-in-aid, Ramakrishna Mission school-te tan grants-in-aid pek tur te, Donyi Polo Vidya Niketan hostel sakna atan Rs vbc 1 leh Tribal language and script chawilarna atan Rs vbc 3.50 ruahman a ni. 

Hei bakah hian Man­jushree Shiksha Niketan, Bomdila-a hostel sakna tur te, Abotani Vidya Niketan-a auditorium siamna tur te, RKM, Lumdung-a infrastructure tihchangtlunna tur scheme tharte siam a ni bawk a ni. Chief minister Pema Khandu chuan kum 2021 chu 'Year of Education' atan hman a ni dawn tih sawiin, education sector chak leh changtlung zawk siam tum a ni, a ti. 

Hei vang hian budget-ah hian elementary educa­tion chu dah pawimawh hle a ni tih a sawi.