BJP leh a thawhpuiten seat insem dan tifel dawn

Assam assembly inthlan neih turah BJP leh a thawhpui party - AGP, UUPL leh GSP-te chuan union home minister Amit Shah leh BJP national president JP Nadda bakah Assam BJP hruaitu leh minister Himanta Biswa Sarma hoin Delhi-ah seat insem dan tur an tifel dawn. 

Nikum December thlaa Bodoland Territorial Council inthlan neih zawh hnu khan, BJP hian Bodoland People's Front (BPF) nena an lo thawhdunna titawpin, United People's Party Liberal (UPPL) leh Gana Suraksha Party (GSP)-te a thawhpui a ni. 

Northeast Democratic Alliance (NEDA) convener Sarma chuan AGP, UPPL leh GSP nena seat insem dan tur hi a thuphung chuan an sawirem tawh tih sawiin, Delhi meeting-ah thutlukna hi an siamfel dawn tih a sawi. Amit Shah hoa meeting neihah hian Sarma, Assam chief minister Sarbananda Sonowal leh an thawhpui party hrang hrang hruaitute hi an tel ang. 

Kum 2016 assembly inthlanah khan BJP hian  Asom Gana Parishad leh BPF a thawhpui a, party mala seat la hnem ber ni bawkin seat 60 a la a ni. AGP hian seat 14 leh BPF hian seat 12 an la bawk. Kum 15 zet lo sorkar tawh Congress sorkar chu paihthlain, BJP kaihhruai ṭangrual sorkar an siam a, independent MLA pakhatin a thlawp bawk. 

BPF hian BJP nena an thawhdunna a tihtawp hnuin, Pathianni khan assembly inthlan lo awm turah Congress party kaihhruai ṭangrual pawlah a tel dawn tih a puang a ni.