Election Commission-in National party-ah NPP puang

Election Commission of India (ECI) chuan June 7, Zirtawpni khan Meghalaya Chief Minister Conrad K. Sangma kaihhruai, National People's Party (NPP) chu national party-ah a puang. NPP hi hmarchhak political party zinga national party-a puan hmasak ber a ni.

ECI secretary, Pramod Kumar Sharma chuan Zirtawpni khan thuchhuah siamin, Election Commission chuan NPP chu national party-ah an pawm ta tih a tarlang a, an symbol 'Lehkhabu' chu NPP symbol atan bik hauh sak an nih thu a tarlang bawk.

NPP hi hmarchhak mi zinga Lok Sabha-a speaker ni thei hmasa sa ber, Corad K. Sangma pa Purno Agitok Sangma din a ni a, Meghalaya, Manipur leh Nagaland-ahte chuan MLA nei tawhin, heng state-ahte hian state party-a chhiar an ni tawh bawk.

ECI-in thuchhuah a siamah chuan NPP hian national party ni tura tlin ngai awmte chu NPP hian an tlin vek tawh tih a tarlang a, Arunachal Pradesh assembly inthlan, 2019-ah pawh khan vote tla zawng zawng aṭangin 14.55% an hmu phak a, seat 60 awmah seat nga an la tih a tarlang. 

PA Sangma fanu, Union Minister lai lo ni tawh Agatha Sangma chu tun Lok Sabha inthlanah khan Tura parliamentary constituency-ah a chak a, tun dinhmunah chuan NPP MP neihchhuan a ni mek. NPP national president leh Meghalaya CM ni bawk Conrad K. Sangma chuan an party, national party-a puan a nihna chu an party hmuchhuaktu leh a pa ni bawk PA Sagma tan a hlan tih a sawi.