Pakyong airport-a Spice Jet service tihtawp vangin Sikkim HC-in suo motu PIL a la
Sikkim Pakyong airport-a Spice Jet service tihtawp chung changah Sikkim High Court chuan suo motu PIL a la.
Spice Jet hi Sikkim airport neihchhuna commercial airline service awmchhun a ni a, September 30 thleng atan a service hi tihtawp lailawk a ni. Sikkim aṭang hian Kolkata leh Guwahati-ah te a thlawk ṭhin. Sikkim Pakyong airport hi Greenfield airport tih a ni bawk a, nikum September 24 khan Prime Minister Narendra Modi chuan a hawng a ni.
Nikum vek October 4 khan thlawhtheihna hi a service ṭan a, mahse kumin May 31 khan service hi an titawp lailawk leh rih thung. Chief Justice Vijai Kumar Bist leh Justice Meenakshi Madan Rai-te kaihhruai division bench chuan Registry-a report a nih dan chuan, thlawhtheihna service hi ni 362 a ni phawt tur a nih laiin ni 125 chiah an service tih an sawi. Chanchinbu-a report a nih danin Pakyong Airport chu Visual Flight Rules (VFR) behchhan a ni a, km 5 tal a ṭum hmain a hmuh theih tur a ni tih sawiin, state sorkar pawhin Instrument Flight Rules (IFR) mode an dah a ṭul dawn tih an sawi bawk a, ram zau zawk a mamawh dawn tih an sawi. Hemi atan hian Airport Authority of India leh sorkar laipui pawhin MoU an ziah a ngai dawn tih an sawi bawk.
Division bench chuan state sorkar chu a dinhmun dik tak, AAI hnenah IFR mode kalpui tura ram an pek theih dawn leh dawn loh tichiang turin an hriattir a ni. Hemi chungchangah hian July 8 hian hearing an nei leh ang. Airport director Ramtanu Saha chuan fur zawh hun, October 1 aṭangin thlawhtheihna service tir a ni leh dawn tih a sawi bawk.