Meghalaya: A vawi khat nan Tura-ah cabinet meeting nei

Meghalaya state cabinet chuan a ṭum khatna atan state khawpuiah ni lo hmun dangah meeting an nei a, nimin khan West Garo Hills-a Tura-ah cabinet meeting hi an nei.

Kum 1972-a state puitlinga hlankai an nih hnu khan cabinet meeting zawng zawng hi state khawpui Shillong-ah vek neih a la ni a, mahse tuna sorkarna siam mek Meghalaya Democratic Alliance (MDA) chuan kalphung hi an rawn thlak ta a ni. 

Chief minister Conrad Sangma chuan Tura-a meeting an neih hma hian a Twitter-ah, Shillong pawna meeting an neih tur thu puang theia a awm chu lawmawm a tih thu leh Tura chu a bulṭanna a nih thu a sawi. District headquarter dangah pawh an chhunzawm zel dawn tih a sawi bawk.

MDA-in Shillong pawna cabinet meeting a huaihawtna chhan hi state chhung hmun hrang hranga mipuite leh cabinet-te inkarah inpawhna ṭha zawk a awm theih nana ti an nih thu an lo tarlang tawh a ni. Meghalaya chhungah hian district 11-a awm a, heng district zawng zawngah hian cabinet meeting hi neih kim vek tura ruahman a ni. 

Nimina Tura meeting-ah hian State Water Policy chu an agenda lian a ni a, mahse he thu buatsaih lai hian meeting report hriat hman a ni lo.