Tripura Kristian-ten Easter Sunday-a inthlan duh lo Inthlan ni sawn turin election commissioner an ngen
Tripura state election commission-in Tripura Tribal Areas Autonomous District Council (TTAADC) inthlan neih hun atan April 4 a ruat chu Easter Sunday a nih avangin inthlan hun sawn turin thuneitute ngen.
United Christian Forum for Human Rights chuan election commissioner hnenah inthlan ni tura ruat chu Kristian sakhua zuitute tana ni pawimawh tak a ni tih sawiin, inthlan hun sawn tura ngenna hi an thehlut a ni. CPI(M) hruaitu leh MP hlui, Jitendra Choudhury pawhin state election commission hun ruat dan chungchangah zawhna siamin, "India hi sakhaw tin zalenna leh thlamuang taka an awmna, sakhaw tinte ang khat veka enna ram a ni. April 4 hi Easter Sunday a ni a, he hun hi Kristiante tan chuan a pawimawh hle a ni. State election commission chuan hemi ni tak hi inthlan neih ni atan a thlang tur a ni lo," a ti.
Congress state vice-president Tapas Dey pawhin sakhaw hun pawimawh taka state election commission-in inthlan ni a ruat chu thil vanduaithlak tak a ni tih a sawi ve bawk. "He thil hian SEC chu sorkar duhdan anga kalin, sakhaw tlem zawkte vote rahbehna atan a ruahman ta emaw ni tih rinhlelhna a awm mai dawn a ni. Voter zawng zawngten vote an thlak vek theihna turin inthlan ni hi sawn turin kan ngen a ni," tiin a sawi.
State election commissioner Manik Lal Dey chuani TTAADC inthlan neih hun tur an ruat dawn hian hun pawimawh leh examination neih hun turte pawh an ngaihtuah tel vek niin a sawi. Seat 28 awmna, district council inthlan hi April 4-ah neih a ni dawn a, inthlan neih tura atana hraittirna hi March 4 khan tihchhuah a ni. District council huam chhungah hian vote nei 8,65,041 awmin, vote thlakna tur polling station 1,244 a awm a ni.