Assam : Congress-in sorkar hnaah hmeichhiate tan 50% hauhsak tiam

Congress party chuan Assam assembly inthlan neih turah an party kaihhruai ṭangrual pawl, Mahajot chu thlan tlin a nih chuan, sorkar hna laknaah hmeichhiate tan 50% hauhsak an tiam. 

All India Mahila Congress president Sushmita Dev chuan Ningani khan Guwahati-ah press conference neiin, Congress kaihhruai ṭangrual pawl chuan hmeichhiate leh ṭhalaite dinhmun chawisan chu a dah pawimawh dawn hle tih a sawi. "Sorkarna kan siam thei a nih chuan hmeichhiate tan 50% reservation kan siam ang. Hei hi kan thil tih hmasa ber tur zinga mi a ni," a ti. 

Dev chuan Assam-a ṭhalaite leh hmeichhiate chuan a thlawna thil pek chu an duh ber a ni lo tiin, hna thawh tur ṭha leh state economy tana tha an thawh ve theihna tur remchang an duh zawk a ni, a ti. Rorellai BJP kaihhruai sorkar chuan hetiang hun remchang hi siamsak loin, sorkar scheme hrang hrang hnuaiah sum sem tawp ṭhinah a puh bawk.