Assam-ah BJP leh a thawhpuiten seat insem dan tur tifel

Assam assembly inthlan neih tura BJP leh a thawhpui party dangte chuan seat insem dan tur chu Ningani zan khan an tifel ta. 

Seat 128 awmna Assam assembly inthlan turah hian BJP chuan seat 92-ah an chuh dawn a, a thawhpui Asom Gana Parishad (AGP) chuan seat 26 leh United People's Party Liberal (UPPL)-in seat 8-ah an chuh bawk ang. 

Tualchhung party pakhat chu BJP-ah inchhung lutin, he party aṭang hian candidate pahnih khat chu BJP symbol  hmangin dintir a ni dawn bawk a ni. 

BJP chuan party candidate tur 84 chu a tifel tawh nia sawi a ni a, hetih lai hian AGP dintu, ṭum hnih chief minister lo ni tawh Prafulla Kumar Mahanta chuan kumin inthlanah hian party ticket a chang lo mai thei nia sawi a ni. Mahanata hi a hriselna a ṭha lo a, Delhi-ah enkawl mek a ni. AGP hruaitu ni laite nen citizenship law chungchangah an ngaihdan a inmil loh avangin party chhungah a tlatlum tawh lo nia sawi a ni. 

Kum 2016 assembly inthlanah khan BJP hian seat 84-ah chuhin, seat 60-ah hnehna a chang a, kum 2011  inthlan aiin seat 55 in a la hnem zawk a ni. AGP hian seat 24-ah chuhin 14-ah a chak a, UPPL hian seat pali-ah chuhin a chak lo vek thung. 

Inthlan hmasaa BJP nena thawkdun, Bodoland People's Front (BPF) chuan BJP a thawhpuina titawpin, Congress kaihhruai ṭangrual pawl a zawm. BPF hian kum 2016 inthlanah khan seat 16-ah chuhin, 12-ah hnehna a chang a ni. 

Assam assembly inthlan hi thawh thuma neih a ni dawn a, March 27, April 1 leh April 6-ah vote thlak a ni dawn a, May 2-a inthlan result hi puan a ni ang. 

BJP hian a ṭum khatna atan kum 2016 inthlanah khan a thawhpuite nen hnehna changin sorkarna a siam a ni. Tun ṭum inthlanah pawh chak leh ngei tumin an campaign ngawrh hle a, prime minister Narendra Modi leh union home minister Amit Shah-te chu star campaigner zingah an tel.