Assam election : Party hrang hrangten candidate tur puang

Assam Legislative Assembly inthlan lo awm tur atan party hrang hrangte chuan an candidate turte hming an puang ṭan ta. 

Seat 126 awmna Assam Legislative Assembly inthlan hi thawh thuma neih a ni dawn a, March 27, April 1 leh April 6-ah vote thlak a ni ang. Inthlan thawh khatna hi constituency 37-ah neih a ni dawn a, a thawh hnihna hi constituency 39 leh a thawh thumna hi constituency 40-ah neih a ni ang. May 2-ah vote chhiarin, inthlan result hi puan a ni dawn. 

Assam assembly inthlan lo awm turah jail-a tang mek, Raijor Dal president activist Akhil Gogoi chu Upper Assam-ah Sivasagar bialah a ding dawn. Raijor Dal working president Bhasco De Saikia chuan Inrinni liam ta khan inthlan thawh khat leh thawh hnihna neih tur atana an party candidate, mi 17-te hming a puang a ni. 

March 27-a inthlan thawh khatna neih turah Raijor Dal hian bial 12-ah an chuh dawn a, April 1-a inthlan thawh hnihna neih turah candidate paruk an siam bawk. Saikia chuan seat chuh tam an tum lohna chhan chu BJP paihthlak an nih ngei theihna tura vote a darh lutuk lohna atan an ti niin a sawi a,  Assam-ah chuan CAA dodaltu sorkar din tir ngei an tum tih a sawi. 

Akhil Gogoi hi kum 2019 December thlaa Citizenship Amendment Act (CAA) duh lohna lantira nawrh a huaihawt avangin man a ni a, National Investigation Agency (NIA) chuan Unlawful Activities (Prevention) Act hnuaiah thubuai a siamsak a, jail-ah a la tang mek a ni. 

Raijor Dal hi Assam-a loneitu pawl, Krishak Mukti Sangram Samiti (KMSS) leh CAA duhlo tu pawl dang 70-ten an din a ni. Inthlan lo awm turah hian All Assam Students’ Union (AASU)-te political party din thar, Assam Jatiya Parishad (AJP) nen an thawkdun dawn a ni. 

BJP chuan kar liam ta Zirtawpni khan assembly inthlan neih tura party candidate tur list hmasa ber a puang. 

BJP leh a thawhpui, Asom Ganada Parishad leh United People's Party Liberal chuan seat insem dan tur hi tifelin, BJP hian seat 70-ah an chuh dawn a, AGP-in seat 26 leh UPPL-in seat 8-ah an chuh ang. Party general secretary Arun Singh chuan candidate turte hming hi puangin, chief minister Sarbananda Sonowal chu Majuli bialah dingin, home minister Himanta Biswa Sarma chu Jalukbari bialah a ding dawn tih a sawi.

Congress-in candidate 40 hming puang

Congress party pawhin nimin khan an party candidate 40-te hming an puang. 

Assam Pradesh Congress Committee (APCC) president Ripun Bora chu Gohpur bialah a ding dawn a, minister hlui Bismita Gogoi chu Khumtai bialah a ding ang. Assembly-a opposition leader, Debabtata Saikia chuan Nazira bialah a chuh dawn bawk.  

Congress kaihhruai ṭangrual pawl, Mahajath-ah hian Assam Pradesh Congress Committee (APCC), All India United Democratic Front (AIUDF), Communist Party of India (CPI),  Communist Party of India (Marxist) or CPI (M), the Communist Party of India (Marxist Leninist) Liberation or CPI(ML), leh Anchalik Gana Marcha (AGM)-te an tel. Inthlan hmasaa BJP nena thawkdun, Bodoland Peoples’ Front (BPF) chuan Mahajath hi a rawn zawm ve leh bawk a ni. 

Assembly inthlan lo awm turah  hian Sivasagar district-ah polling official atana hmeichhe hlang dahna tur, all-women polling station 18 siam a ni. 

District election officer chuan Inrinni liam ta khan hriattirna tichhuakin, inthlan thawh khatna, March 27-a neih tur atan district chhunga constituency pathum - Amguri, Thowra leh Sivasager-ah all-women polling station paruk ṭheuh siam a nih thu a sawi.