AP CM-in Don Bosco College-a sports stadium hawng

Arunachal Pradesh chief minister Pema Khandu chuan kar liam ta Inrinni khan Jullang-a Don Bosco College-a sports stadium thar a hawng. 

He sports stadium hi Pema Khandu pa, chief minister hlui Dorjee Khandu hriatrengna atan a hming puttir a ni. Stadium sak a nih theihna atan Don Bosco thuneitute inpek leh hmalakna chu fakawm a tih thu sawiin, CM chuan mi dangte tana entawn tlak an ni tih a sawi. Khandu hian kum 2017-a college a tlawh ṭum khan zirlaite hmasawnna turin college compound-ah sports stadium siam a ṭulzia a hmu a, hei vang hian stadium sakna tur hian cheng vaibelchhe thum sanction a nih thu a puang a ni. 

CM chuan, "Harsatna a awm avangin sum sanction zat a vaia pekchhuah thei a ni lo a, pawi  ka ti hle a ni. Mahse  hetichung hian college thuneitute enpuina hnuaiah education department-a engineering wing chuan he project hi ṭha takin an zo thei a ni,"  a ti. Rs vbc 3 sanction aṭang hian Rs vbc 2 chauh pekchhuah ala ni a, a bak hi kumin chhungin pek chhuah ngei CM chuan a tiam bawk.