Assam sorkarin a thlawnin Kidney Dialysis ti dawn

Assam sorkar chuan an state chhungah kidney dialysis leh kal kaihhnawih treatment reng reng chu a thlawna kalpui turin thutlukna a siam.

Assam Health Minister Himanta Biswa Sarma chuan Thawhlehni khan hemi chungchang hi a sawi a, Pradhan Mantri National Dialysis Prog­ramme (PMNDP) scheme hnuaiah a thlawnin kidney dialysis leh kal kaihhnawih treatment reng reng chu kalpui a ni dawn tih a sawi a ni. 

PMNDP hi Assam chhung hmun 18-ah Public Private Partnership (PPP) mode-a kalpui tur a ni a, he programme kalpui tur hian National Health Mission, Assam chuan Apollo Hospitals, Chennai chu a thlang bawk. Hemi atan hian Assam sorkar chuan February 5, 2019 khan  inremna a ziahpui.

Himanta Biswa Sarma chuan unit tinah hian ni khatah dialysis 40 a tih theih dawn tih a sawi. Thuthar thehdarhtuten an kawmnaah Biswa Sarma chuan an state a kal natna nei an tam chhan chu an thlai eiah mihring tana hlauhawm chemical a tel tam vang tih a sawi a, hei hian kal a nghawng a ni, a ti bawk.

Hemi chungchangah hian Sarma chuan hma an la mek tih sawiin, hmun hrang hrang aṭanga thlai sample an lakte chu Indian Council of Medi­cal Re­search (ICMR) hnenah an thawn tih a sawi a, report a chhuah hunah thlaiahte hian chemical engzat chiah nge tel tih an hre thei dawn tih a sawi a, a tihtawpna turin hma an la dawn tih a sawi bawk a ni. 

Assam Health Minister chuan dialysis centre chu damdawi-in pariat - SMK Civil Hospital (Nalbari), Managaldai Civil Hospital (Darrang), Kanaklata Civil Hospital (Sonitpur), Tezpur Medical College & Hospital (Sonitpur), LGB Civil Hospital (Tinsukia), Morigaon Civil Hospital (Morigaon), Fakhruddin Ali Ahmed Medical College (Barpeta), leh Bongaigaon District Hospital (Bongaigaon) ahte an hawng thuai dawn tih a sawi.

July thla tawp lamah chuan BP Civil hospital (Nagaon), Sivasagar Civil Hospital (Sivasagar), North Lakhimpur Civil Hospital, Dhe-maji Civil Hospital, Diphu Civil Hospital, Dhubri Civil Hospital, leh Goalpara Civil Hospital-ahte chuan centre dang hawn belh leh hman an tum tih a sawi.

June 4 khan Assam-a  dialysis session hmasa ber chu Swahid Mukanda Kakati Civil Hospital-ah hlawhtling taka neih a lo ni tawh bawk.