Manipur: India-Myanmar hnuh hnaihna tur Conference an zo

‘Connecting India’s Northeast with northwest region of Myanmar: Roadmap for all-round Prosperity' conference chu Thawhlehni khan Manipur state khawpui Imphal-ah neih a ni a, nimin khan zawhfel a ni.

Conference ṭanna hunah hian chief minister N Biren Singh, Myan­mar-a Magway Region chief minister Dr Aung Moe Nyo, Manipur chief secretary Dr J Suresh Babu leh  India Foundation director Capt Alok Bansel-te chu an tel a ni.

Manipur chief minister N Biren Singh chuan India Act East Policy chu ASEAN-te nena inzawmna ṭha zawk neihna tur leh a bik takin Myanmar nena inzawmna ṭha zawk hmarchhak state ten an neihna tur a nih thu a sawi. 

India-Myanmar-Thailand Trilateral Highway siam hna kalpui mek pawh a rang thei ang bera zawh a; Cambodia, Laos leh Vietnam-te pawh pawhtir tum a ni tih a sawi. Trans Asian Railway Link chungchang pawh sawiin; Myanmar nena rel hmanga inkalpawh theih dan tur chungchang a sawi bawk a, Mandalay-Imphal Bus service tura thil ṭulte pawh tihfel ṭep a ni tawh tih a sawi a ni. 

Magway Region chief minister Dr Aung Moe Nyo pawhin thu sawiin, Myanmar chuan Manipur chu medical tourism lama theihna sang tak nei nia an hriat thu a sawi. India leh Myanmar-in inkungkaihna ṭha tak an neih thu sawiin, hun lokal zel turah pawh inzawmna ṭha an neih zel a beisei thu a sawi.

Union of Myanmar Ambassador Moe Kyaw Aung, Consul General of India Mandalay Nandan Singh Bhaisora, Cease Fire Monitoring Group Chairman Lt Gen Shokin Chau­han, Assam Rifles official pawi­mawh te, Myanmar aiawhte leh India sorkar aiawhte bakah, Think Tank leh Academician ṭhahnem tak conference-ah hian an tel bawk a ni.

India Foundation, New Delhi buatsaih, India-Myanmar Confe­rence hmang tura lokal Myanmar mite hian nimin khan Manipur hi an chhuahsan a ni.