Meghalaya-ah mihring hmanga sumdawng ṭhin mi 12 man

Meghalaya West Jaintia Hills Police hnuaia Special Investigation team chuan Thawhṭanni khan mihring hmanga sumdawng ṭhin mi pahnih an man leh a, tun thla chhunga mihring hmanga sumdawng ṭhin mi 12 an manna a ni.

An man zinga pakhat hi Fire Service-a thawk police a ni a, Jowai-a Khimusiang-a cheng Khroolan Nongrum (41) a nih thu tarlan a ni a, pakhat zawk pawh hi Jowai-a cheng tho Lekipaya Phawa (31) a ni. SIT-te hian hmeichhe naupang pakhat an chhan­chhuah hnen aṭanga an thudawn bawhzuiin heng mi pahnihte hi an man ta tih sawiin, Thawhṭanni vek khan court-ah hruai nghal an ni.

West Jaintia Hills SP, Lakador Syiem chuan mihring hmanga sumdawn­naa police mi ngei an tel chuan police hmel a tichhe hle tih a sawi a, an chhui­chianna chu mipui hmaah tarlan a nih thu leh midang pawh an la man belh leh ngei a beisei thu a sawi.

SIT hi Dy.SP M.J. Marngar, Addl SP, B.Chetri, DSP D. Moksha leh DSP S.Mukherjee-te'n an kaihruai a, June 2 khan midang 10 an man tawh bawk a ni.