Them Iew Mawlong chungchangah MHA-in Meghalaya sorkar hriattirna pe

Meghalaya state khawpui Shillong-a sumdawnna hmun lian ber, Motphran (Them Iew Mawlong) a buaina lian tak a chhuah hnu kum khatnaah Union Ministry of Home Affairs chuan hemi kaihhnawihah hian state sorkar chu an ruahmannate thlen turin a hriattir. 

He thubuai kalzelah hian state sorkar chuan Them Iew Maw­long-a chengte sawn chhuah a tum a, hemi chungchang sawipui tur hian state sorkar hi koh a ni. Deputy chief minister, Pres­tone Tynsong chuan MHA-in an koh thu hi sawiin, Thew Iew Mawlong-a chengte sawnchhuah tur chungchang an sawipui dawn tih a sawi. Hemi chungchangah hian nimin khan New Delhi-ah meeting an nei a, state sorkar aiawhin chief secretary P S Thangkhiew chu a kal a ni.

Dy. CM Prestone Tynsong chuan Them Iew Mawlong-a chengte chu sawnchhuah ngei an tum tih sawiin, an chenna hmun chu mihring chenna atan a tlak loh tih a sawi. Tynsong chuan Motphran-a chengte chu chhuak turin hun an pe rei tawk tawh tih sawiin, tun hi dan loa cheng an ni lo tih finfiahna an thehluh theih hun tawp a ni tawh mai thei tih a sawi bawk.

Them Iew Mawlong hi Punjabi community-te chenna hmun a ni a, sorkarin chhuak tura a ti pawh hi Sikh community-te chuan an dem hle a ni. Tynsong chuan hemi chung­changah hian Sikh community-a NGO-te chu sorkar angin an che tur a ni lo tih sawiin; Punjab, Delhi leh rampawn aṭangte pawhin sorkar chu an rawn dem tih a sawi. Hemi chungchangah hian pawnlam aṭanga thil sawisel mai loin a hmun tlawha thil awmdan zirchiang turin a ti a ni. Sorkar pawh inbiakna nei turin an inpeih reng tih a sawi.

Dy. CM chuan Them Iew Mawlong hmun chu rambuai a ni lo tih a sawi a, 1954-a inremna siam a nih angin Mylliem-a Syiem-te leh Shillong Minicipal Board ram a ni tih a sawi a ni. Nikum June thlaah khan Motphran hmunah hian Punjabi community-te leh midang inkarah buaina a chhuak vak a, hemi hnu hian Punjabi community-te hi chhuak tura nawrna a nasa hle a ni.