Meghalaya sorkarin Sorkar laipuiah report thehlut

Meghalaya sorkar chuan Ningani khan sorkar laipuia Ministry of Home Affairs hnenah Them Iew Mawlong chungchang report a thehlut a, Shillong-a Punjabi community-te himna pek a tiam.

Ministry of Home Affairs (MHA) chuan Them Iew Maw­long chungchangah hian Megha­laya sorkar chu report theh­lut turin a hriattir a, Ningani khan state chief secretary PS Thangkhiew chu state sorkar aiawh hian New Delhi-ah kalin MHA hian meeting a neihpui a ni. 

Meeting-ah hian Sikh political party Alkali Dal hruaitu Manjinder Singh Sirsa pawh a tel a, Sirsa chuan Home Ministry hnena Meghalaya sorkarin report an thehluhah hian Shillong Punjabi lane-a cheng Sikh leh Punjabi community-te himna tur an tiam tih a sawi.

Shillong-a Them Iew Mawlong (Motphran), Punjabi lane tia an sawi bawkah hian Punjabi-te hi kum 200 kalta vel aṭang khan an khawsa tawh a, British ho hunlai khan sweeper leh cleaner turin British ho khan an hruailut a ni.

Nikum May thla khan Punjabi lane-ah hian buaina nasa tak a chhuak a, Shillong-ah pawh thla khat lai curfew puan a ngaih phah a ni. Hemi hnu hian thuneitute chuan Punjabi lane-a chengte chu chhuak turin an ti a, hmun danga sawnchhuah an tum a ni.  

Punjabi lane-a chengte hian hel pawl Hynniewtrep National Liberation Council (HNLC) te hnen aṭanga vauna an dawn avangin Alkali Dal hruaitu Sirsa hian Union Home Minister Amit Shah chu inrawlh turin a ngen a, hemi avang hian MHA hian Meghalaya sorkar hi an ko ta a ni. 

Hetihlai hian Punjabi lane-a cheng Harijan Panchayat Committee-te chuan Meghalaya chief minister Conrad K Sangma hnenah inhumhimna an dil thung.