Nagaland-ah hmasawnna a awm thei lo : Zeliang
Nagaland Assembly-a opposition leader leh chief minister hlui ni bawk TR Zeliang chuan sorkar lai Nationalist Democratic Progressive Party (NDPP) chu beiin, Naga People's Front (NPF) MLA-te hel rengah a puh.
NPF Central Executive Council meeting, state khawpui Kohima-a neihah Zeliang chuan sorkar lai NDPP chu NPF MLA-te veha an buai reng avangin Nagaland-ah hmasawnna a awm thei lo tih a sawi. Zeliang chuan an MLA pasarih-te an party kalh zawnga an chet chungchang pawh sawichhuakin, a pawi a tih loh thu leh tlemte, inlungrual deuh nih a ṭha zawk tih a sawi bawk. Citizenship Amendment Bill chungchang pawh sawiin, NPF chuan PDA sorkarin Naga mipuite Constitution Article 371(A)-in CAB aṭanga a humhim tih an sawi chu an pawm ngai dawn lo tih a sawi a ni.
Article 371(A)-in CAB aṭanga Naga mipuite a humhim nia an sawi chu mipuite bumna mai a nih thu sawiin, NPF-in MP pahnih an neihte chu Lok Sabha leh Rajya Sabha-a CAB do tlat turin a chah bawk.
Naga politics buaina chinfel thuai duh
NPF hian meeting an neih zawh hnuah hian thuchhuah siamin sorkar laipui leh NSCN-IM-te'n Framework Agreement an siam chu an thlawp reng tih sawiin, inremna zawhawm leh pawmawm tak siam thuai se an duh thu an tarlang.
NPF chuan Naga politics buaina chinfelna tur chu tihkhawtlai ni tawh lo se an duh thu sawiin, Naga nihna bo zawnga inremna siam erawh an duh lo tih an tarlang thung. NPF chuan Naga ancestral area chu hmun khata chhunkhawm an duh thu an tarlang a, sorkar laipuiin compulsory subject-a Hindi siam an tum erawh an dodal thung.