Manipur CM ban a nih theih nan BJP MLA-te Delhi-ah an kal

Manipur-a sorkarna siam mek BJP sorkar chhungah thuneihna inchuha buaina a chhuak tih media ṭhenkhat chuan an tarlang. Hemi kaihhnawihah hian Minister, MLA ṭhenkhatte leh MP-te chu New Delhi-ah an kal a, saffron party hruaitu lute an hmu a ni. 

Ningani khan Manipur chief minister N Biren Singh hian cabinet a siksawi a, hei hi duh loin an party legislator ṭhenkhat chu New Delhi-ah hian an kal nghal a, Chief Minister hi ban a nih theihna turin sorkar laipui hruaitute an dawr nia tarlan a ni. 

CM Biren Singh hian deputy chief minister Yumnam Joykumar Singh leh PWD minister Th Biswajit Singh-te chu an nihna aṭangin a ban a, amah hian finance, public work leh power department-te a chang zui bawk. Joykumar Singh hi BJP thawhpui NPP MLA a ni a, Biren Singh hian Dy. CM a nihna bakah finance porfolio chu a chhuhsak a ni. CM hian minister pahnihte hi financial discipline palzutah a puh a, mahse hei hi Minister-te hian an pha thung.

Biswajit Singh hian N Biren Singh banna tur campaign hi a kalpui mek a ni. An party MLA 21 zinga 17 chuan Prime Minister Narendra Modi leh Union home minister Amit Shah hnenah Biren Singh banna tur memorandum hi an thehlut nia sawi a ni a, hemi chungchangah hian thuchiang erawh hriat a ni lo.