Japan-in hmarchhakah Rs. vbch. 13,000 invest dawn
Japan chuan hmarchhaka project hrang hrang kalpui mek leh project thar kalpuina turin cheng vaibelchhe 13,000 a invest dawn tih, Development of North Eastern Region (DoNER) official-te chuan thuchhuah an siam.
Tun hnai khan Union Minister for Development of North Eastern Region (DoNER) Jitendra Singh leh Japan aiawhte hian meeting an nei a, Japan aiawhte hi Ambassador Kenji Hiramatsu chuan a kaihruai a ni. Meeting hi New Delhi-ah neih a ni a, hmalakna tur hrang hrangte an sawiho a ni.
DoNER chuan Japan-in project thawh mekah a puih turte chu - Guwahati Water Supply Project leh Guwahati Sewage Project, Assam leh Meghalaya inkara kalpui Northeast Road Network Connectivity Improvement Project, Meghalaya-a Northeast Network Connectivity Improvement Project, Sikkim-a Bio-diversity Conservation and Forest Management Project, Tripura-a Sustainable Forest Management Project, Mizorama Technical Cooperation Project for Sustainable Agriculture and Irrigation leh Nagaland-a Forest Management Project-te pawh a tel tih an tarlang.
Jitendra Singh hian tun hnai kum li chhung vela hmarchhaka hmasawnna an thlen avangin Japan aiawha lo kalte hnenah hian lawmthu a sawi bawk. Japan International Cooperation Agency (JICA) te chuan Tripura-a hmasawnna project thawhna atan cheng vaibelchhe 1,364 an lo pe tawh bawk a, 2016 khan Meghalaya leh Mizoram-a National Highway pawimawh pahnih - NH 54 leh NH 51-te siamṭhat nan cheng veibelchhe 4,000 loan-in a lo puktir tawh bawk a ni.