India leh Myanmar sipai ṭangrualten Hmarchhakah beihpui an thlak
India leh Myanmar sipai ṭangrualte chuan kar thum chhung vel chu hmarchhak hmun hrang hrang - Manipur, Nagaland leh Assam-ahte hel lakah beihpui an thlak tawh.
Defence official-te chuan thla thum kalta khan beihpui thlak thawh khatna an nei tih sawiin, a hmingah 'Operation Sunrise' tih an vuah a, Indo-Myanmar border velah beihpui thlakin hel camp eng emaw zat an chhuhsak tawh a ni.
Myanmar leh India hian hmarchhakah km. 1,640 vel zeta thui inrina an nei a, India chuan ramri venghim chung si a ram pahnih sipaite thawhdunna tur a ngaihtuah tih an tarlang bawk.
Defence lam chuan tunhnaia beihpui an thlak leh hi 'Operation Sunrise 2' tih a nih thu an sawi a, ram pahnih sipaite hi thawkdunin hel pawl hrang hrang - Kamtapur Liberation Organisation (KLO), NSCN (Khaplang), United Liberation Front of Assam (I) leh National Democratic Front of Boroland (NDFB) te camp tichhe turin hma an la dun tih an sawi.
Beihpui an thlak dunnah hian hel 72 vel chu an man tawh tih sawiin, camp pawh eng emaw zat an tihchhiatsak tawh tih an sawi a ni. Ram pahnih sipaite hian beihpui thlak thawh thumna pawh an la nei dawn nia sawi a ni bawk a, intelligence hnen aṭ-anga thu an dawn dan leh boruak awmdan a zirin an thawk dun leh maithei tih an sawi.
Beihpui thlaknaah hian Indian Army mai bakah Assam Rifles-te pawh an tel. Nikum thleng kha chuan hmarchhak helte hian Myanmar-ah camp 50 vel an nei nia sawi a ni.
Hun kal tawha hmalak tawhna
June 2015 khan Indian Army-te hian Indo-Myanmar border-ah tho hian NSCN(K) lakah beihpui an lo thlak tawh bawk a, hemi ṭum hian Manipur-ah hel 18 an that a ni.
Thla thum kaltaa 'Operation Sunrise' kalpui a nih khan ram pahnih sipaite hian Myanmar-a Arakan Army-te an bitum ber a, Arakan Army-te hian Kaladan multi-modal transit transport project an dodal avangin buaina an chawk chhuak a ni. Kaladan multi-modal project hi India tana Southeast Asia gateway tura ngaih a nih avangin India hian a ngai pawimawh hle.
He project atan hian India leh Myanmar chuan April, 2008 khan inremna an lo ziak tawh a, project hi an kalpui zawh hunah chuan Mizoram tantlangin Myanmar Rakhine state-a Sittwe Port a kalpawh theih dawn a ni.