Assam-ah kum khat dang AFSPA pawhsei leh duh

Assam-a security agency-te chuan kum khat dang atan Armed Forces Special Powers Act (AFSPA) pawhsei leh an duh tih an sawi.

August thla hian Assam-a Armed Forces (Special Powers) Act hman mek chu hlih a ni tawh dawn a; kum 29 zet hnuah AFSPA hi hlih a ni dawn a ni. Sorkar laipui pawhin Army-te chu Assam an chhuahsan dan tur ruahmanna siam fel turin a hriattir tawh bawk.

Hetihlai hian Army officer pakhat chuan thla hmasa lawk pawh khan bomb puak a awm a, Arunachal Pradesh-ah pawh mi 11 thah an nih thu leh MLA thleng pawha thah an nih thu a sawi. Hemi vang hian AFSPA chu heng lai velah hian hman chhunzawm a la ngai hle tih a sawi a ni.

AFSPA hmang hian sipaite chuan mi tupawh, thupek dawng kher loin an kap thei a, mahse hei hi mi tam tak chuan an sawisel nasa hle thung. Army officer chuan ULFA-te pawhin an pawla tel tur mi an lakbelh mek tih thu an dawn thu a sawi a, NDFB-te pawhin he tiang bawk hian hma an la mek tih a sawi bawk. Heng zawng zawng ngaihtuah hian AFSPA chu hman a la ṭul hle a, a bik takin ramriahte chuan hman chhunzawm a la ngai hle tih a sawi a ni.

Assam bikah phei chuan National Register of Citizens (NRC) kalpui mek a nih avangin, a ṭul hle tih a sawi a, NRC tlangzarh a nih hunah phei chuan buaina a chhuak thut thei tih a sawi.

Assam police-te pawhin an state chhung hmun hrang hrangah AFSPA kalpui an la duh tih an sawi ve bawk. Assam-ah hian 1990 aṭang khan AFSPA hi hman ṭan a ni a, mahse AFSPA hman theihna hi tih tlem hret hret a ni a, tunah hian state chhung hmun ṭhenkhatah chiah an hmang tawh.

Hetihlai hian Meghalaya leh Tripura-ah chuan AFSPA hi hlih fel a ni tawh a, Assam leh Nagaland hmun ṭhenkhatah chuan la hman chhunzawm zel a ni thung. Manipur leh Arunachal Pradesh hmun ṭhen­khatah pawh AFSPA hi hman mek a la ni bawk.