Assam election 2021 : BJP minister-in Congress zawm
Assam-a BJP kaihhruai sorkara cabinet minister ni lai, Sum Ronghang chuan asssembly inthlan lo awm turah BJP ticket a chan loh avangin Congress party a zawm tih a sawi.
BJP hian inthlan neih tura an party candidate turte puangin, list-ah hian MLA nilai 11 an tel lo. Party ticket a chan loh avanga lungawi loin, Pathianni khan Assam Hills area development minister Ronghang chuan BJP chhuahsanin, Congress party a zawm nghal. MLA ṭanglai 11-in candidate an chan phak loh laiin, January thlaa Congress party aṭanga BJP zawmtu, minister hlui Ajanta Neog erawh chu Golaghat bialah BJP ticket a chang thung.
Assam Pradesh Congress Committee (APCC) president Ripun Bora chuan BJP minister-in an party a zawm chu lawmawm a tih thu sawiin, Karbi Anglong district-a an party dinhmun pawh a tihchak phah hle a beisei thu a sawi.
AIUDF-in candidate tur puang
Assembly inthlan neih tur atan Raijor Dal, BJP leh Congress party-te chuan an party candidate ṭhenkhat list an tichhuak tawh a, All India United Democratic Front (AIUDF) pawhin seat 16-a an candidate turte hming an puang ve leh.
AIUDF hi Congress kaihhruai ṭangrual pawl, Mahajot-ah an tel a ni. Mahajot-ah hian Congress, BPF, CPI(M), CPI, CPI-ML leh Anchalik Gana Morcha-te an tel. Party candidate tura ruat zingah hian MLA ṭanglai 13 zinga parasih an tel tih AIUDF president Bahdruddin Ajmal chuan a sawi. Candidate 16 zinga 11 hi ṭangrual pawl hnuaia an seat chan tur insema din tir an ni a, seat panga-ah chuan 'friendly contest' anga kal an tum thu a sawi.
Bihar party 3-in inthlan chuh ve tum
Bihar regional party pathum, JD(U), RLSP leh RJD chuan Assam inthlanah hian chuh ve an tum.
Bihar chief minister kaihhruai, Janata Dal (United) leh union minister hlui Upendra Kushwaha kaihhruai Rashtriya Lok Samta Party chuan party malin inthlan hi chuh an tum a, hetih lai hian Bihar-a eptu pawl, Rashtriya Janata Dal (RJD) chuan Congress kaihhruai ṭangrual pawl thawhpui a tum thung.
JD(U) hian seat 32-ah chuh a tum a, RLSP hian seat 72-ah chuh tumin, RJD hian seat 16-ah chuh an duh thu ṭangrual pawl hnenah hian an thlen tawh bawk. An seat chuh duhna hmunte pawh sawiin, heng hmun hi Bihar, Jharkhand leh Uttar Pradesh aṭanga kal, Hindi leh Bhojpuri ṭawng hmang tamna bialte an ni.