Hmarchhaka International Airport Pathumna tur 'Agartala Airport'

Tripura transport and tourism minister Pranajit Singha Roy chuan Agartala airport chu international airport-ah nakkumah chuan puan hman a ni dawn tih nimin khan a sawi.

Pranajit Singha Roy chuan Airport Authority of India (AAI)-in Agartala-a Maharaja Bir Bikram (MBB) airport, international airport tura buatsaih mek chu kumin kum tawp lamah hi chuan an zo fel hman dawn tih sawiin, fur ruahtui tlak nasat avanga buaina an tawhthu a sawi a, nakkum 2020-ah chuan international airport-ah puan hman a ni dawn, a ti.

AAI hian Agartala airport tihchangtlunna tur hian cheng vaibelchhe 438 hu project an kalpui mek a, state sorkar pawhin project hnathawh chu zo vat tura an nawr ve reng thu a sawi. Chief minister Biplab Kumar Deb pawhin tunhnai khan New Delhi-ah Civil Aviation Minister hmuin, Agartala aiport tihchangtlun chungchang hi a sawipui tawh bawk a ni.

Chief Minister Office chuan union civil aviation minister Raj Kumar Singh pawhin a lawmawm zawngin a chhang tih thuchhuah an lo siam tawh bawk. Tunah hian Guwahati-a Lokpriya Gopinath Bordoloi International Airport leh Im­phal-a Bir Tikendrajit Inter­national Airport-te chu hmar­chhakin international airport an neih mekte an ni.