Punjab sorkar aiawhten Meghalaya tlawh dawn
Punjab sorkar aiawh mi palite chuan Shillong-a Punjabi chengte report bawhzuiin, Meghalaya an tlawh dawn.
Punjab chief minister Amarinder Singh pawhin hemi chungchangah hian Meghalaya chief minister Conrad Sangma lehkha a thawn tawh bawk a, Punjabi-te himna ngaipawimawh turin a ngen. Punjab sorkar aiawha kal turte hi minister Sukhbinder Singh Sarkaria chuan a kaihruai dawn a, MP pahnih Ravneet Singh Bittu leh Jasbir Singh Gill-te bakah MLA Kuldeep Singh Vaid-te an kal dawn a ni.
Shillong-ah hian Conrad Sangma leh official pawimawhte an hmu dawn tih Punjab sorkar thupuangtu chuan a sawi. Meghalaya state khawpui Shillong-a cheng Punjabi-te hian thuneitu lam aṭanga an awmna chhuahsan tura nawrna an dawn thu an sawi a, hemi avang hian Punjab sorkar aiawhte hian Meghalaya hi an tlawh dawn a ni. Punjabi-te hian local organization-te hnen aṭangin vauna an dawng tih an sawi a, sorkarin chhuak tura a tihna an zawm lo a nih chuan a man an tel ngei dawn tia vauna thu an dawn thu an sawi bawk.
Meghalaya CM-in Sikh-te himna a tiam
Pathianni khan Shiromani Gurdwara Parbandhak Committee (SGPC) leh Delhi Sikh Gurdwara Management Committee (DSGMC)-te chuan New Delhi-a cham mek Meghalaya chief minister Conrad Sangma chu an hmu.
Conrad Sangma chuan Shillong-a Punjabi lane-a cheng Sikh-te himna tur chu a tiam a, him taka an awm theihna atana venhimna kalpui ngai ṭul zawng zawng chu Meghalaya sorkarin hma an la dawn tih a sawi. Hetihlai hian SGPC leh DSGMC aiawh kaihruaitu Union Minister Harsimrat Kaur Badal chuan Sikh-ten harsatna an tawh mek chinfelna turin sorkar chuan a siam dawn tih a sawi ve bawk.
Sangma chuan Dy. CM Prestone Tynsong kaihhruai committee, Sikh-te leh Khasi-te inpuh tawnna chungchang ngaihtuah tur din a nih tawh thu a sawi a ni.