Tripura: BJP-IPFT inkar a ṭha lo

Tripura-a sorkarna siam mek party pahnih - Bharatiya Janata Party (BJP) leh  Indigenous People’s Front of Tripura (IPFT)-te inkar chu a ṭha lo hle nia sawi a awm zeuh zeuh hnuah, Thawhṭanni khan IPFT-te chuan an party thlawptute chu BJP worker-te'n an beih thu an sawi.

IPFT thupuangtu Mangal Debbarma chuan BJP worker-te'n an mite an bei reng tih a sawi. An thawhpuiten an beih reng avang chuan an hlau hle tih leh sorkarna siam ho reng chung sia vauna leh beihna an tawk reng chu thil mak tak a nih thu a sawi. Debbarma chuan buaina hi tawp nghal turin a duh tih a sawi bawk.

Beih chhunzawm zel an nih chuan IPFT chuan kawng dang an ngaihtuah a ṭul dawn a ni, a ti. Mangal Debbarma chuan an party-in an state chhungah division 30 an nei tih a sawi a, heng division zawng zawngah hian an worker-te leh anmahni thlawptute chuan beih an tawk tih a sawi. "May 23-a election result puan a nih hnu khan kan party worker 100 vel chuan beih an tawhnaah hliam an tuar tawh a ni," a ti bawk.

Hetihlai hian BJP chuan Dhalai district-a Gandacherra-a East Tripura tribal reserve seat BJP MP Rebati Tripura inah IPFT-te'n an party worker an beih thu an sawi ve thung. Hemi ni vek hian IPFT chuan an divisional leader Premsadhan Tripura chu BJP-te'n an bei niin an puh ve leh bawk.

Police-te chuan hemi chung changah hian Gandacherra police station-ah BJP-in FIR an thehlut tih an sawi a, BJP thupuangtu Ashok Sinha chuan IPFT puhna hi a pha bawk a ni. Sinha chuan buaina chawk chhuak zawnga politics kalpui chu an duhdan a ni lo tih sawiin, mi zawng zawngin Ganda­cherra-a an MP ina inbeihna thleng chungchangah chuan thudik an hria tih a sawi.

Nikum state assembly inthlan­ah khan seat 60 awmna Tri­pura-ah hian BJP-IPFT ṭangrualte hian sorkarna an siam a, seat 44 an la a ni. BJP hian seat 36 an la a, IPFT hian hian seat pariat an la thung. Hetihlai hian eptu party lian ber Communist Party of India - Marxist (CPI-M) chuan seat 16 chiah an la.