AP CM leh Kiren Rijiju-te'n meeting an ko 2024-ah National Games buatsaih an tum
Arunachal Pradesh chief minister Pema Khandu chuan Thawhlehni khan Union Minister of State (Independent) for Youth Affairs & Sports Kiren Rijiju chu a office-ah hmuin meeting a neihpui.
An pahnih hian meeting ko nghalin, meeting hi an kaihruai dun nghal a, Arunachal Pradesh-a sports activity leh sports infrastructure-a hmasawnna thlenna tur chungchang an sawi a ni. Meeting-ah hian official pawimawh tak takte an tel a, sports minister Mama Natung leh chief secretary Satya Gopal-te pawh an tel.
Arunachal-a sport hmasawnna tura national programme - Khelo India kalpui a nihna tura infrastructure an neih ṭhat tawk loh thute pawh sawiho a ni a; Yupia, Chimpu, Pasighat, Aalo leh Daporijo-a outdoor stadium sak mek chungchang pawh an sawiho bawk.
Meeting chuan 2024-a National Games buatsaih an ruahman a, hemi atana ṭul hrang hrang bawizui dan turte an ngaihtuah bawk a ni. Sports discipline hrang hrang - boxing, weightlifting, football, martial arts etc. a hmasawnna thlen dan tur an sawiho bawk a, football leh badminton academy chungchangte pawh an sawi ho. North East Youth Festival 2019-20, Arunachal-a neih tura rawtna awm chungchang pawh an sawi a ni.