Meghalaya: Punjab sorkar aiawhten Shillong an thleng

Meghalaya state khawpui Shillong-a Punjabi lane buaina kaihhnawiha Meghalaya an tlawh tur thu an sawi hnuah, Punjab sorkar aiawhte chuan Nilaini khan Shillong an thleng.

Punjab sorkar aiawhte hi Punjab water resources minister Sukhbinder Singh Randhawa chuan a kaihruai a, an state MP pahnih - Ravneet Singh Bittu leh Jasbir Singh Gill-te bakah MLA Kuldeep Singh Vaid-te an ni.

Nimin khan deputy chief minister, Prestone Tynsong leh home minister, James PK Sangma-te an hmu nghal a, mahse he thu buatsaih lai hian meeting thuchhuak hriat hman a ni lo. 

Punjab sorkar aiawhte hian chief minister Corad K Sangma pawh hmu turin ruahmanna an siam a, mahse Sangam hi New Delhi-ah a cham mek avangin nimin khan an hmu thei ta lo a ni.

Thuthar thehdarhtuten an kawmnaah Sukhbinder Singh Randhawa chuan Shillong-a cheng mekte chuan beihna nasa zawk an tawh an chief minister-in a hlauhthawn avangin hmanhmawh takin Shillong an pan tih a sawi. 

Meghalaya sorkar hnenah chuan Sikh-te kum 150 lai an lo chen tawhna, a hmingah pawh Punjabi Lane tih ni hial tawh chu Sikh-te chuan an chhuahsan lohan turin an ngen dawn tih sawiin, state sorkar pawhin Sikh mipuite humhim chu an ngaipawimawh tur a ni, a ti.

Punjab minister chuan Meghalaya mi tam tak Punjab-a lehkha zir an awm tih sawiin, hemi a nih avang hian community pahnih inkarah hian buaina a chhuah an duh lo tih an sawi.

Punjabi Lane-ah hian nikum May thlaah khan bus driver leh Sikh-te inkara buaina a chhuah avangin nasa takin khawpui pumah buaina a chhuak zui a, rei tak curfew puan a ngai hial.

Helai hmuna cheng Sikh-te hi sorkar chuan sawnchhuah a tum a, hetihlai hian hel pawl - Hynniewtrep National Liberation Council (HNLC)-te chuan lo vau ve bawkin, sorkar thupek an zawm lo a nih chuan an tuhrah an seng ngei dawn tiin an lo vau ve bawk. Hemi a nih avang hian Punjab sorkar aiawhte hian Meghalaya sorkar thuneitute hi an hmu ta a ni.