Meghalaya sorkar chungah Punjab sorkar aiawhte lawm

Meghalaya state khawpui Shillong-a Them Iew Mawlong buaina chungchanga Meghalaya tlawha zin, Punjab sorkar aiawhte chuan Meghalaya sorkar lo dawn sawn danah lawm thu an sawi.

Punjab sorkar aiawh mi palite hian Nilaini khan Shillong hi an thleng a, Ningani khan sorkar mi pawimawhte an hmu nghal a, an duhnate an thlen nghal a ni. Meghalaya home minister, James PK Sangma an hmuh hnuah a lo dawnsawn danah an lawm thu sawiin, Meghalaya sorkar chuan buaina chinfelna tur kawngah rilru an seng tak tak tih an hriat chuan a tilawm hle tih an sawi.

Punjab Congress MP Jaspir Gill Dimpa chuan Meghalaya sorkarin buaina chinfel hlenna tur an duh chuan a tilawm hle tih sawiin, buaina chinfelna tur chu an neih thuai a beisei thu a sawi bawk. Punjab sorkar aiawh hian mi panga - MP pahnih Ravneer Singh Bittu leh Jasbir Singh Gill, minister Sukhjinder Singh Randhawa bakah, MLA pahnih - Kuldeep Singh Vaid leh Kulbir Singh Zira-te an kal a ni. Anni bakah hian special secretary (planning) D S Mangat chu a tel ve bawk a ni.

Jaspir Gill Dimpa chuan buaina chu chinfel hlen a ṭul thu sawi bawkin, Meghalaya sorkar chuan eng ang takin nge buaina an chinfel dawn la sawi thei lo mah se; High Level Committee-in buaina chinfelna tur a ngaihtuah mek tih an sawi a ni, a ti.

Dimpa chuan sorkarin Sikh mite sawn chhuah a tum chungchanga an zawhna chhangin, HLC chuan hemi chungchang hi an ngaihtuah mek thu leh sorkar chuan a chinfelna tur an ngaihtuah chhuak ngei ang tih a rin thu a sawi a ni.

Them Iew Mawlong-a dan loa chengte erawh sorkarin a zawngchhuak dawn a, hma a lak thuai dawn thu a sawi. Dimpa chuan Sikh mipuite chuan sorkarah rinna an nghat nasa hle a ni, a ti bawk.

Meghalaya Home Minister chuan Punjab sorkar aiawhte hian Punjab Chief Minister hnen aṭanga lehkha thawn, Meghalaya Chief Minister hnena pek tur an hnutchhiah tih a sawi. Sikh mite him taka an awm theihna tur chungchangah an dawr tih sawiin, theihtawp a chhuah dawn thuin a chhang tih a sawi bawk a ni.