Nagaland-ah AYUSH Directorate din dawn

Sorkar laipui chuan Nagaland-ah AYUSH Directorate din sak a tiam.

Nilaini khan New Delhi-ah Nagaland minister for health and family welfare, S Pangnyu Phom leh Union Minister of State for AYUSH Shripad Yesso Naik-te chuan meeting an nei a, meeting an neihnaah hian Shripad Yesso Naik hian Nagaland-a AYUSH Directorate din hi a tiam a ni.

Yesso Naik chuan Phom hnenah hian AYUSH project chuan Nagaland-a district zawng zawng a huam vek dawn tih a sawi a, Phom pawhin an state-a  AYUSH scheme kalpui a nih dan chungchang Union Minister hnenah hian a hrilh. Phom chuan an state-a district zawng zawngah AYUSH damdawi-in din turin a ngen bawk.

Union Minister chuan an project ruahman dante a rang thei ang bera thehlut turin a ti a ni. Phom hi state health and family welfare commissioner leh secretary Himato leh director Vizolie-te'n an ṭawiawm.

Nagaland planning and coordination minister Neiba Kronu pawhin sorkar laipui hnenah hian Ekalavya Model Residential School (EMRS), state chhunga block zawng zawnga pek chhunzawm turin a ngen ve bawk a, zirlaite hnena zirna quality ṭha pek a phut a ni.

Kronu hian union tribal affairs minister Arjun Munda hnenah a ngenna hi Thawhlehni khan a thlen a ni.