Tripura CM-in World class city-ah Agartala siam tum

Tripura chief minis­ter Biplab Kumar Deb chuan Thawhlehni khan 'Agartala Smart City Mission' hnuaia project panga thawhna tur lungphum a phum a, Agartala chu world class city-ah siam tum a nih thu a sawi bawk.  

Biplap Kumar Deb hian Maharaja Bir Bik­ram College Road tih­changtlunna tur lungphum a phum a, dil pathum - Maharaja Bir Bikram (MBB) College lake, Ranir pukur pond leh Dimsagar-II pond-te hmasawnna tur leh Agartala khawpuia hmun 20-a modern bus stop siamna tur project lung­phum a phum nghal bawk.

He hunah hian Agar­tala chu world class city-ah siam a tum thu a sawi a, tunlai hmanrawn ṭha ber bera thuam tum a ni, a ti. Biplab Kumar Deb chuan tunah pawh traffic signal system changkang tak, kawngpui zau tak, uluk taka enkawl park leh parking service ṭha tawk tak an nei mek tih a sawi a ni.

Chief Minister leh state urban development minister ni bawk Deb chuan water management system ṭha zawk siamna leh water drainage system ṭha zawk siamna project an kalpui mek tih a sawi bawk. Prime Minister Naren­dra Modi chuan 2015 khan ramchhung hmun hrang hrangah Smart Cities Mission a tlangzarh a, heta smart city tur thlanchhuah hmasak 100 zingah hian Agartala pawh hi a tel tih CM chuan a sawi.

Khawpui tihchang­kanna atan hian budget-ah cheng vaibelchhe 2,063 dah a ni tih leh sorkar laipui leh state chuan hei hi an intum sem tih a sawi. State sorkarin a tum ve tur 50% chu HUDCO leh Asian Development Bank (ADB) ṭanpuinain an nei dawn tih a sawi bawk.

Deb chuan project an zawh hunah chuan a enkawl hna pawh a hautak dawn a, Agartala Municipal Corporation (AMC)-in pawisa an neih loh bawk si avangin chhiah lam tihsan a ngai mai thei tih a sawi a, hemi chungchangah hian mipuite chu lo inhmakhua lawk turin a ti.

Tripura lal ropui tak king Maharaja Bir Bikram Kishore Manikya Bahadur pawh khan khawpui changkang taka Agartala siam chu a duhthusam a nih thu a sawi tel bawk a ni.