PM-in ‘Maitri Setu’ bridge a hawng
Prime minister Narendra Modi chuan nimin khan Tripura leh Bangladesh inkara ‘Maitri Setu’ bridge dawh a hawng a, state chhunga infrastructure project lungphum a phum bawk.
PM Modi hian video conference hmangin hun hi a hmanpui a ni. Maitri Setu bridge chu a kaihhruai sorkarin Bangladesh nena inzawmna ṭha neih zel a duhzia tihlanna leh, hmarchhak bial tana connectivity ṭha leh changtlung a ngaih pawimawhzia a lanna a ni, a ti. Bangladesh prime minister Sheikh Hasina pawhin thu sawiin, lei dawh hawn a ni ta chu lawmawm a tih thu leh, ram pahnihte tana thil chhinchhiah tlak a nih thu a sawi ve bawk.
He lei hi Feni lui chungah dawh niin, km 1.9-a thui a ni a, Sabroom, Tripura leh Ramgarh, Bangladesh inkarah dawh a ni. National Highways and Infrastructure Development Corporation Ltd chuan lei dawh hna hi thawkin, cheng vaibelchhe 133 senga siam a ni.
Modi hian Sabroom-a Intergrated Check Post lungphum a phum bawk. Land Ports Authority of India chuan he project hi a thawk dawn a, hna thawhna atan hian Rs vbc 232 ruahman a ni. Hei bakah hian Unakoti district headquarters leh Khowai district headquarters inkara NH208 siamna tur lungphum a phum bawk. He kawngpui siam tur hi km 80-a thui tur niin, Rs vbc 1,078 senga siam a ni ang.
Prime Minister hian Pradhan Mantri Awas Yojana (Urban) hnuaia chenna in 40,978 sak te, Agartala Smart City Mission hnuaia Integrated Command and Control Centre siamte a hawng a, Old Motor Stand-a Multi Level Car Parking and Commercial Complex lungphum a phum bawk a ni.
Hmasawnna hna chak taka kalpui a ni chu Tripura leh central-ah BJP sorkar a din ve ve vang, double engine government a awm vang a ni tiin PM chuan a sawi.